AP BJP కొత్త చీఫ్‌ సోము వీర్రాజు నియామకంపై కన్నా ఆసక్తికర ట్వీట్

ఏపీ బీజేపీ నూతన అధ్యక్షుడిగా ఎమ్మెల్సీ సోము వీర్రాజు నియమితులైన సంగతి తెలిసిందే. ఈ నియామకంపై ప్రస్తుతం అధ్యక్షుడిగా ఉన్న కన్నా లక్ష్మీనారాయణ స్పందించారు. ‘భారతీయ జనతా పార్టీ ఆంధ్రప్రదేశ్ నూతన అధ్యక్షులుగా నియమించబడిన ఎమ్మెల్సీ శ్రీ సోము వీర్రాజు గారికి హృదయపూర్వక శుభాకాంక్షలు’అంటూ ట్వీట్ చేశారు. పరోక్షంగా సోము నియామకాన్ని కన్నా స్వాగతించారు. అలాగే ఆయనకు పార్టీలో మరో పదవి అప్పగిస్తారనే చర్చ జరుగుతోంది.

బీజేపీ జాతీయ అధ్యక్షుడు జేపీ నడ్డా సోము వీర్రాజును ఏపీ పార్టీ చీఫ్‌గా నియమించారు. ఈ మేరకు బీజేపీ జాతీయ ప్రధాన కార్యదర్శి అరుణ్ సింగ్ సోమవారం ఓ ప్రకటన విడుదల చేశారు. తూర్పుగోదావరి జిల్లా కత్తేరు గ్రామానికి చెందిన సోమువీర్రాజు ప్రస్తుతం బీజేపీ ఎమ్మెల్సీగా కొనసాగుతున్నారు. ఏపీ బీజేపీ చీఫ్‌గా ప్రస్తుతం కన్నా లక్ష్మీనారాయణ ఉన్నారు. కాంగ్రెస్ పార్టీ నుంచి బీజేపీలోకి వచ్చిన కన్నా లక్ష్మీనారాయణకు 2018లో అనూహ్యంగా అధ్యక్ష పదవి దక్కింది. వైసీపీలో చేరేందుకు కన్నా లక్ష్మీనారాయణ రంగం సిద్ధం చేసుకున్న తరుణంలో పార్టీ అధ్యక్ష పదవిని కట్టబెట్టిందనే వాదనలు ఉన్నాయి. కన్నా లక్ష్మీనారాయణ సారధ్యంలో 2019 ఎన్నికల్లో పోటీకి దిగిన బీజేపీ ఘోరంగా ఓటమి పాలైంది.

అప్పటి నుంచే కన్నా లక్ష్మీనారాయణను పార్టీ చీఫ్ పదవి నుంచి తప్పిస్తారనే చర్చలు జోరందుకున్నాయి. ఈ తరుణంలో ఆరెస్సెస్‌తో దశాబ్దాలుగా ఉన్న అనుబంధం, బీజేపీలో ముఖ్య నాయకుడిగా ఉన్న సోము వీర్రాజుకు పార్టీ అధ్యక్ష పదవి వస్తుందని అందరూ భావించారు. మధ్యలో ఎమ్మెల్సీ మాధవ్‌కు పదవి దక్కనుందనే వార్తలు వచ్చినా, చివరకు పార్టీ సీనియర్ నాయకుడైన సోము వీర్రాజుకు అధ్యక్ష కుర్చీ దక్కింది.

Leave a Reply

Your email address will not be published. Required fields are marked *