రాజకీయ సంక్షోభం వేళ.. అశోక్ గెహ్లాట్ సన్నిహితులపై ఐటీ దాడులు

పార్టీలో ఏర్పడిన అసమ్మతి కారణంగా ఏర్పడిన రాజకీయ సంక్షోభంతో రాజస్థాన్ ముఖ్యమంత్రి ఉక్కిరిబిక్కిరి అవుతుండగా.. పలుచోట్ల ఆదాయపు పన్ను శాఖ దాడులు జరగడం కలకలం రేపుతోంది. దాదాపు 200 మంది అధికారులు సోమవారం రంగంలోకి దిగి.. సీఎం గెహ్లాట్‌కు అత్యంత సన్నిహితులైన ఇద్దరు నేతల ఇల్లు, వ్యాపార సంస్థల్లో సోదాలు నిర్వహించారు. ధర్మేందర్‌ రాథోడ్‌కు చెందిన దాదాపు 12 ప్రాంతాల్లో సోదాలు జరిపినట్లు అధికారులు తెలిపారు. అలాగే కాంగ్రెస్ రాజస్థాన్ పార్టీ వైస్ ప్రెసిడెంట్, నగల వ్యాపారి రాజీవ్‌ అరోరా నివాసంలోనూ ఐటీ అధికారులు తనిఖీలు చేపట్టారు. ఈ ఇద్దరూ గహ్లాట్‌కు అత్యంత సన్నిహితులు కావడం గమనార్హం.

జైపూర్‌, కోటా, ఢిల్లీ, ముంబయిలో పలు ప్రాంతాల్లో సోదాలు నిర్వహించినట్లు అధికారులు వెల్లడించారు. పన్ను ఎగవేశారన్న ఫిర్యాదుల నేపథ్యంలోనే సోదాలు నిర్వహించినట్లు పేర్కొన్నారు. ముఖ్యంగా దేశం వెలుపల చేసిన లావాదేవీలపై దృష్టి సారించినట్లు వివరించారు.

రాజకీయ సంక్షోభం కొనసాగుతున్న సమయంలో ఐటీ సోదాలు జరగడం చర్చనీయాంశంగా మారింది. రాజకీయ కుట్రలో భాగంగానే ఈ సోదాలు జరుగుతున్నాయని కాంగ్రెస్‌ ఆరోపిస్తోంది. ఐటీ దాడులపై ఆ పార్టీ అధికార ప్రతినిధి రణ్‌దీప్‌ సూర్జేవాలా స్పందిస్తూ.. ‘తొలుత బీజేపీకి చెందిన లాయర్లు రంగంలోకి దిగారు. ఇప్పుడు జైపుర్‌లో ఐటీ శాఖ దాడులు ప్రారంభించింది. ఎన్‌ఫోర్స్‌మెంట్‌ డైరెక్టరేట్‌ ఎప్పుడు రాబోతోంది?’ అని ట్వీట్‌ చేశారు. ‘ఐటీ (ఆదాయపు పన్ను శాఖ), ఈడీ (ఎన్‌ఫోర్స్‌మెంట్ డైరెక్టరేట్), సీబీఐ (సెంట్రల్ బ్యూరో ఆఫ్ ఇన్వెస్టిగేషన్)లు బీజేపీ జేబు సంస్థలు’ అని ఆయన ఆరోపించారు.

‘మమ్మల్ని భయపెట్టడానికే ఉద్దేశపూర్వకంగానే ఐటీ దాడులు చేయిస్తున్నారు.. దీనిని తీవ్రంగా ఖండిస్తున్నాను.. ఇలాంటి బెదిరింపులకు భయపడం.. దేశం మొత్తం దీనిని గమనిస్తోంది’అని రాజస్థాన్ ప్రభుత్వ చీఫ్ విప్ అన్నారు.

Leave a Reply

Your email address will not be published. Required fields are marked *